Masal abr zameen ka libaas ho jaon
Jo youn nhi to sumandar ki piyaas ho jaon
Tamaam din ki kari dhoop mein ye sochta hoon
Mein shab k pichley pehar ka hiraas ho jaon
Ab apney waastey tujhey maangney se khoaf aaye
Tu haath uthaa k teri iltimaas ho jaon
Bujhi bujhi aankhon ki teergi ki qasam
Tujhey parhun to sitaara shanaas ho jaon
Khushi mili to kayi dard mujh se rooth gaye
Dua karo k mein phir se udaas ho jaon
Meri kitaab k unwaan zara qareeb aao
Mein apney aap tera iqtibaas ho jaon
Ab apney aap sanwarney ka shoaq kya "Muhsin"
Kisi ujartey huey dil ki aas ho jaon.
No comments:
Post a Comment